ուրբաթ, ապրիլ 3
3 / 4 / 2020
Ռուբեն Ռուբինյանն ընդունել է Մեծ Բրիտանիայի եւ Հյուսիսային Իռլանդիայի Միացյալ Թագավորության գործերի ժամանակավոր հավատարմատարին

Ռուբեն Ռուբինյանն ընդունել է Մեծ Բրիտանիայի եւ Հյուսիսային Իռլանդիայի Միացյալ Թագավորության գործերի ժամանակավոր հավատարմատարին

Հունվարի 24-ին ՀՀ ԱԺ արտաքին հարաբերությունների մշտական հանձնաժողովի նախագահ Ռուբեն Ռուբինյանն ընդունել է Մեծ Բրիտանիայի եւ Հյուսիսային Իռլանդիայի Միացյալ Թագավորության գործերի ժամանակավոր հավատարմատար Դեյվիդ Մորանին եւ քաղաքական ու մամուլի գծով ղեկավար Ստիվ Դոդդսին:

Ողջունելով հյուրերին՝ Ռուբեն Ռուբինյանը կարեւորել է միջխորհրդարանական հարթակներում երկու երկրների միջեւ փոխգործակցության զարգացումը:

Հանձնաժողովի նախագահը խոսել է Թավշյա հեղափոխությունից հետո Հայաստանի կողմից վարվող արտաքին քաղաքականության գերակայությունների մասին: Ռուբեն Ռուբինյանը ներկայացրել է Լեռնային Ղարաբաղի հիմնախնդրի խաղաղ կարգավորման առնչությամբ հայկական կողմի դիրքորոշումը, անդրադարձել ՀՀ-ԵՄ Համապարփակ եւ ընդլայնված գործընկերության համաձայնագրի վավերացման եւ Եվրամիության հետ վիզաների ազատականացման հարցերին:

Քննարկվել են Եվրամիության կազմից Միացյալ Թագավարության դուրս գալուց հետո երկկողմ հարաբերություններին առնչվող մի շարք հարցեր:

Զրուցակիցները մտքեր են փոխանակել նաեւ Մերձավոր Արեւելքում տիրող իրավիճակի վերաբերյալ:

  • Կիսվել: